[313] Yena reṇu rājā, tenupasaṅkamīti evameva antarā daṭṭhukāmo vā sallapitukāmo vā na bhavissati, tato chinnapalibodho sukhaṃ viharissāmīti palibodhūpacchedanatthaṃ upasaṅkami, esa nayo sabbattha.

[316] Sādisiyoti samavaṇṇā samajātikā.

[317] Navaṃ saṇṭhāgāraṃ kārāpetvāti rattiṭṭhānadivāṭṭhānacaṅkamanasampannaṃ vassike cattāro māse vasanakkhamaṃ bahi naḷaparikkhittaṃ vicittaāvasathaṃ kāretvā. Karuṇaṃ jhānaṃ jhāyīti karuṇāya tikkacatukkacatukkajjhānaṃ jhāyi, karuṇāmukhena panettha avasesāpi tayo brahmavihārā gahitāva. Ukkaṇṭhanā ahu paritassanāti jhānabhūmiyaṃ ṭhitassa anabhiratiukkaṇṭhanā vā bhayaparitassanā vā natthi, brahmuno pana āgamanapaṭṭhanā āgamanataṇhā ahūti attho.

Brahmunāsākacchāvaṇṇanā