อานนฺทตฺเถโร ปน ตุณฺหีเยว นิสีทิ. อถ นํ ภิกฺขู เอวมาหํสุ "อาวุโส อานนฺท ภิกฺขุสํโฆ อุปฏฺฐากฏฺฐานํ ยาจติ, ตวํปิ ยาจาหี"ติ. โส อาห "ยาจิตฺวา ลทฺธุปฏฺฐานํ นาม อาวุโส กีทิสํ โหติ, กึ มํ สตฺถา น ปสฺสติ, สเจ โรเจสฺสติ, ๕- อานนฺโท มํ อุปฏฺฐาตูติ วกฺขตี"ติ. อถ ภควา "น ภิกฺขเว อานนฺโท อญฺเญน อุสฺสาเหตพฺโพ, สยเมว ชานิตฺวา มํ อุปฏฺฐหิสฺสตี"ติ อาห. ตโต ภิกฺขู "อุฏฺเฐหิ ๖- อาวุโส อานนฺท ทสพลํ อุปฏฺฐากฏฺฐานํ ยาจาหี"ติ อาหํสุ. เถโร อุฏฺฐหิตฺวา จตฺตาโร ปฏิกฺเขเป, จตสฺโส จ อายาจนาติ อฏฺฐ วเร ยาจิ.

จตฺตาโร ปฏิกฺเขปา นาม:- "สเจ ภนฺเต ภควา อตฺตนา ลทฺธํ ปณีตํ จีวรํ น มยฺหํ ทสฺสติ, ปิณฺฑปาตํ น ทสฺสติ, เอกคนฺธกุฏิยํ วสิตุํ น ทสฺสติ, นิมนฺตนํ คเหตฺวา น คมิสฺสติ, เอวาหํ ภควนฺตํ อุปฏฺฐหิสฺสามี"ติ วตฺวา "กํ ปเนตฺถ อานนฺท อาทีนวํ อทฺทสา"ติ ๗- วุตฺเต "สจาหํ ภนฺเต อิมานิ วตฺถูนิ ลภิสฺสามิ, ภวิสฺสนฺติ เม วตฺตาโร `อานนฺโท ทสพเลน ลทฺธํ ปณีตจีวรํ ปริภุญฺชติ, ปิณฺฑปาตํ ปริภุญฺชติ, เอกคนฺธกุฏิยํ วสติ, เอกโตว

@๓ อิ. ปูเรสึ. ๔ ฉ.ม. อสุญฺญาเยว เม สา ทิสา