สพฺพพุทฺธานํ จ อายุเวมตฺตํ ปมาณเวมตฺตํ กุลเวมตฺตํ ปธานเวมตฺตํ รสฺมิเวมตฺตนฺติ ปญฺจ เวมตฺตานิ โหนฺติ. อายุเวมตฺตํ นาม เกจิ ทีฆายุกา โหนฺติ, เกจิ อปฺปายุกา. ตทา หิ ทีปงฺกรสฺส วสฺสสตสหสฺสํ อายุปฺปมาณํ อโหสิ, อมฺหากํ ภควโต วสฺสสตํ อายุปฺปมาณํ.

ปมาณเวมตฺตํ นาม เกจิ ทีฆา โหนฺติ, เกจิ รสฺสา. ตถา หิ ทีปงฺกโร อสีติหตฺโถ อโหสิ, สุมโน นวุติหตฺโถ, อมฺหากํ ปน ภควา อฏฺฐารสหตฺโถ.

กุลเวมตฺตํ นาม เกจิ ขตฺติยกุเล นิพฺพตฺตนฺติ, เกจิ พฺราหฺมณกุเล. ปธานเวมตฺตํ นาม เกสญฺจิ ปธานํ อิตฺตรกาลเมว โหติ, ยถา กสฺสปสฺส ภควโต. เกสญฺจิ อทฺธนียํ ยถา อมฺหากํ ภควโต.

รสฺมิเวมตฺตํ นาม สุมงฺคลสฺส ๒- ภควโต สรีรรสฺมิ ทสสหสฺสีโลกธาตุปฺปมาณา อโหสิ. อมฺหากํ ภควโต สมนฺตา พฺยามมตฺตา. ตตฺร รสฺมิเวมตฺตํ อชฺฌาสยปฏิพทฺธํ. โย ยตฺตกํ อิจฺฉติ, ตสฺส ตตฺตกํ สรีรปฺปภา ผรติ. สุมงฺคลสฺส ปน นิจฺจํปิ ทสสหสฺสีโลกธาตุํ ผลตูติ อชฺฌาสโย อโหสิ. ปฏิวิทฺธคุเณสุ ปน กตฺถจิ ๓- เวมตฺตํ นาม นตฺถิ.