[209] Bhikkhuparisā ānandaṃ dassanāyāti ye bhagavantaṃ passitukāmā theraṃ upasaṅkamanti, ye ca "āyasmā kira ānando samantapāsādiko abhirūpo dassanīyo bahussuto saṃghasobhano"ti therassa guṇe sutvāva āgacchanti, te sandhāya "bhikkhuparisā ānandaṃ dassanāya upasaṅkamantī"ti vuttaṃ. Esa nayo sabbattha. Attamanāti savanena no dassanaṃ sametīti sakamanā tuṭṭhacittā. Dhammanti "kacci āvuso khamanīyaṃ, kacci yāpanīyaṃ, kacci yonisomanasikāre kammaṃ karotha, ācariyūpajjhāyavattaṃ pūrethā"ti evarūpaṃ paṭisanthāradhammaṃ. Tattha bhikkhunīsu "kacci bhaginiyo aṭṭha garudhamme samādāya vattathā"ti idaṃpi nānākaraṇaṃ hoti. Upāsakesu āgatesu "upāsaka na te kacci sīsaṃ vā aṅgaṃ vā rujjati, arogā te puttabhātaro"ti na evaṃ paṭisanthāraṃ karoti, evaṃ pana karoti "kathaṃ pana upāsakā tīṇi saraṇāni pañca sīlāni rakkhatha, māsassa aṭṭha uposathaṅgāni karotha, mātāpitūnaṃ upaṭṭhānavattaṃ karotha, dhammikasamaṇabrāhmaṇe paṭijaggathā"ti upāsikāsupi eseva nayo.

@3 cha.Ma. byatto, i. vayatto 4 cha.Ma.,i. yoni somanasikārena

@5 cha.Ma.,i. uposathe 6 cha.Ma.,i. pūretha