Imāni tesaṃ sattannaṃpi nāmāni. Tesu hi eko sattabhū nāma ahosi, eko brahmadatto nāma, eko vessabhū nāma, eko teneva saha bharato nāma, eko reṇu nāma, dve pana dhataraṭṭhāti ime satta bhāravāti satta jambūdīpatale bhāravā mahārājāno ahesuṃ.

Paṭhamabhāṇavāravaṇṇanā niṭṭhitā.

Kittisaddaabbuggamanavaṇṇanā

[311] Upasaṅkamiṃsūti "amhākaṃ ayaṃ issariyasampatti na aññassānubhāvena, mahāgovindassānubhāvena nipphannā. Mahāgovindo amhe satta rājāno samagge katvā jambūdīpatale patiṭṭhāpesi, pubbūpakārissa pana na sukarā paṭikiriyā kātuṃ. Amhe sattapi jane esoyeva anusāsatu, etaṃyeva senāpatiṃ ca purohitaṃ ca karoma, evaṃ no vuḍḍhi bhavissatī"ti cintayitvā upasaṅkamiṃsu. Mahāgovindopi "mayā ete samaggā katā, sace etesaṃ añño senāpati ca purohito ca bhavissati, tato attano attano senāpatipurohitānaṃ vacanaṃ gahetvā aññamaññaṃ bhindissanti, adhivāsemi nesaṃ senāpatiṭṭhānaṃ ca purohitaṭṭhānaṃ cā"ti cintetvā "evaṃ bho"ti paccassosi.