[429] Tirorājānopīti tiroraṭṭhe aññasmiṃpi janapade rājāno jānanti. Abyattoti avisado accheko. Kopenapīti ye maṃ evaṃ vakkhanti, tesu uppajjanakena kopenapi naṃ etaṃ diṭṭhigataṃ harissāmi pariharissāmīti gahetvā vicarissāmi. Makkhenāti tayā vuttakāraṇamakkhalakkhaṇena makkhena. Palāsenāti tayā saddhiṃ yugaggāhalakkhaṇena palāsena.

Dvesatthavāhūpamāvaṇṇanā

[430] Haritakapaṇṇanti yaṃkiñci haritakaṃ, antamaso allatiṇapaṇṇaṃpi na hotīti attho. Āsannaddhakalāpanti āsannaddhadhanukalāpaṃ. Āsittodakāni vaṭumānīti paripuṇṇasalilā maggā ca kandarā ca. Yoggānīti balibaddhe.

Bahunikkhantaroti bahunikkhanto, ciranikkhantoti attho. Yathābhatena bhaṇḍenāti yaṃ vo tiṇakaṭṭhodakabhaṇḍaṃ āropitaṃ, tena yathābhatena yathāropitena, yathāgahitena vāti attho.