[432] Mama ca sūkarabhattanti mama ca sūkarānaṃ idaṃ bhattaṃ. Uggharantanti upari gharantaṃ. Paggharantanti heṭṭhā parissavantaṃ. Tumhe khvettha bhaṇeti tumhe yo ettha bhaṇe. Ayameva vā pāṭho. Tathāhi pana me sūkarabhattanti tathāhi pana me ayaṃ gūtho sūkarānaṃ bhattaṃ.

[434] Āgatāgataṃ kalinti āgatāgataṃ parājayagulaṃ gilati. Pajohissāmīti pajohanaṃ karissāmi, balikammaṃ karissāmīti attho. Akkhehi dibbissāmāti gulehi kīḷissāma. Pāsakehi kīḷissāma. Littaṃ paramena tejasāti paramatejena visena littaṃ.

[436] Gāmapajjanti vuṭṭhitagāmadeso vuccati. "gāmapadan"tipi pāṭho, ayameva attho. Sāṇabhāranti sāṇavākabhāraṃ. Susannaddhoti subaddho. Tvaṃ pajānāhīti tvaṃ pajāna, sace gaṇhitukāmosi, gaṇhāhīti vuttaṃ hoti.

Khomanti khomavākaṃ. Ayasanti kāḷalohaṃ. Lohanti tambalohaṃ. Sajjhunti rajataṃ. Suvaṇṇanti suvaṇṇamāsakaṃ. Abhinandiṃsūti tusiṃsu.