๙. อาฏานาฏิยสุตฺต

ปฐมภาณวารวณฺณนา

[๒๗๕] เอวมฺเม สุตนฺติ อาฏานาฏิยสุตฺตํ. ตตฺรายํ อนุปุพฺพปทวณฺณนา:-

จตุทฺทิสํ รกฺขํ ฐเปตฺวาติ อสุรเสนาย นิวารณตฺถํ สกฺกสฺส เทวานมินฺทสฺส จตูสุ ทิสาสุ อารกฺขํ ฐเปตฺวา. คุมฺพํ ฐเปตฺวาติ พลคุมฺพํ ฐเปตฺวา. โอวรณํ ฐเปตฺวาติ จตูสุ ทิสาสุ อารกฺขิเก ฐเปตฺวา. เอวํ สกฺกสฺส เทวราชสฺส อารกฺขํ สุสํวิหิตํ กตฺวา อาฏานาฏานคเร ๑- นิสินฺนา สตฺต พุทฺเธ อารพฺภ อิมํ ปริตฺตํ พนฺธิตฺวา "เย สตฺถุ ธมฺมอาณํ อมฺหากญฺจ ราชอาณํ น สุณนฺติ, เตสํ อิทญฺจิทญฺจ กริสฺสามา"ติ สาวนํ กตฺวา อตฺตโนปิ จตูสุ ทิสาสุ มหติยา จ ยกฺขเสนายาติ อาทีหิ จตูหิ เสนาหิ อารกฺขํ สํวิทหิตฺวา อภิกฺกนฺตาย รตฺติยา ฯเปฯ เอกมนฺตํ นิสีทึสุ.