อายตนปณฺณตฺติเทสนาวณฺณนา

[๑๔๖] อิโต ปเรสุ อปรํ ปนาติ อาทีสุ วิเสสมตฺตเมว วณฺณยิสฺสาม. ปุริมวารสทิสํ ปน วุตฺตนเยเนว เวทิตพฺพํ.

อายตนปณฺณตฺตีสูติ อายตนปญฺญาปนาสุ. อิทานิ ตา อายตนปญฺญตฺติโย ทสฺเสนฺโต ฉยิมานิ ภนฺเตติ อาทิมาห. อายตนกถา ปเนสา วิสุทฺธิมคฺเค วิตฺถาเรน กถิตา, เตน น ตํ วิตฺถารยิสฺสาม, ตสฺมา ตตฺถ วุตฺตนเยเนว สา วิตฺถารโต เวทิตพฺพา. เอตทานุตฺตริยํ ภนฺเต อายตนปณฺณตฺตีสูติ ยา อยํ อายตนปณฺณตฺตีสุ อชฺฌตฺติกพาหิรววฏฺฐานาทิวเสน เอวํ เทสนา, เอตทานุตฺตริยํ. เสสํ วุตฺตนยเมว.