ทินฺนาทายิโนติ โจริกาย กิญฺจิ อคฺคเหตฺวา สามิเกหิ ทินฺนํเยว อาทายิโน. สุกตกมฺมกราติ "กึ เอตสฺส กมฺเมน กเตน, น มยํ กิญฺจิ ลภามา"ติ อนุชฺฌายิตฺวา ตุฏฺฐหทยา ยถา ตํ กมฺมํ สุกตํ โหติ, เอวํ การกา. กิตฺติวณฺณหราติ ปริสมชฺเฌ กถาย สมฺปตฺตาย "โก อมฺหากํ สามิเกหิ สทิโส นตฺถิ, ๓- มยํ อตฺตโน ทาสภาวํปิ น ชานาม, เตสํ สามิกภาวํปิ น ชานาม, เอวํ โน อนุกมฺปนฺตี"ติ คุณกถาหารกา. เสสมิธาปิ ปุริมนเยเนว โยเชตพฺพํ.
[๒๗๒] เมตฺเตน กายกมฺเมนาติ อาทีสุ เมตฺตจิตฺตํ ปจฺจุปฏฺฐเปตฺวา กตานิ กายกมฺมาทีนิ เมตฺตานิ นาม วุจฺจนฺติ. ตตฺถ ภิกฺขู นิมนฺเตสฺสามีติ วิหารคมนํ, ธมฺมกรกํ ๔- คเหตฺวา อุทกปริสฺสาวนํ, ปิฏฺฐิปริกมฺมปาทปริกมฺมาทิกรณญฺจ เมตฺตํ กายกมฺมํ นาม. ภิกฺขู ปิณฺฑาย ปวิฏฺเฐ ทิสฺวา "สกฺกจฺจํ ยาคุํ เทถ, ภตฺตํ เทถา"ติ อาทิวจนญฺเจว, สาธุการํ ทตฺวา ธมฺมสฺสวนญฺจ สกฺกจฺจํ ปฏิสนฺถารกรณาทีนิ จ เมตฺตํ วจีกมฺมํ นาม. "อมฺหากํ กุลูปกตฺเถรา อเวรา โหนฺตุ อพฺยาปชฺฌา"ติ เอวํ จินฺตนํ เมตฺตํ มโนกมฺมํ นาม. อนาวฏทฺวารตายาติ อปิหิตทฺวารตาย. ตตฺถ สพฺพทฺวารานิ วิวริตฺวาปิ สีลวนฺตานํ
@๓ ฉ.ม., อิ. อตฺถิ ๔ ฉ.ม. ธมกรณํ อทายโก อการโก ปิหิตทฺวาโรเยว. สพฺพทฺวารานิ ปน ปิทหิตฺวาปิ เตสํ ทายโก การโก วิวฏทฺวาโรเยว. อิติ สีลวนฺเตสุ เคหทฺวารํ อาคเตสุ สนฺตญฺเญว นตฺถีติ อวตฺวา ทาตพฺพํ. เอวํ อนาวฏทฺวารตา นาม โหติ.