รูปนฺติ จตฺตาโร จ มหาภูตา จตุนฺนญฺจ มหาภูตานํ อุปาทาย รูปํ, ตํ สพฺพํปิ รุปฺปนฏฺเฐน รูปํ. ตสฺส วิตฺถารกถา วิสุทฺธิมคฺเค วุตฺตนเยเนว เวทิตพฺพา.
อวิชฺชาติ ทุกฺขาทีสุ อญาณํ. อยมฺปิ วิตฺถารโต วิสุทฺธิมคฺเค กถิตาเยว. ภวตณฺหาติ ภวปฏฺฐนา. ยถาห "ตตฺถ กตมา ภวตณฺหา. โย ภเวสุ ภวจฺฉนฺโท"ติ อาทิ.
ภวทิฏฐีติ ภโว วุจฺจติ สสฺสตํ, สสฺสตวเสน อุปฺปชฺชนกทิฏฺฐิ. สาปิ "ตตฺถ กตมา ภวทิฏฺฐิ. `ภวิสฺสติ อตฺตา จ โลโก จา'ติ ยา เอวรูปา ทิฏฺฐิ ทิฏฺฐิคตนฺ"ติ ๒- อาทินา นเยน อภิธมฺเม วิตฺถาริตา. วิภวทิฏฺฐีติ วิภโว วุจฺจติ อุจฺเฉทํ, อุจฺเฉทวเสน อุปฺปชฺชนกทิฏฺฐิ. สาปิ "ตตฺถ กตมา วิภวทิฏฺฐิ. `น ภวิสฺสติ อตฺตา จ โลโก จา'ติ ยา เอวรูปา ทิฏฺฐิ ทิฏฺฐิคตนฺ"ติ ๓- อาทินา นเยน ตตฺเถว วิตฺถาริตา.
อหิริกนฺติ "ยํ น หิริยติ หิริยิตพฺเพนา"ติ ๔- เอวํ วิตฺถาริตา นิลฺลชฺชตา. อโนตฺตปฺปนฺติ ยํ "น โอตฺตปฺปติ โอตฺตปฺปิตพฺเพนา"ติ ๕- เอวํ วิตฺถาริโต อภายนอากาโร.