@๗ ฉ.ม. อสฺสรณตา ๘ อภิ. สงฺ. ๓๔/๑๓๕๗/๓๐๔
@๙ อภิ. สงฺ. ๓๔/๑๓๕๗/๓๔๐
อินฺทฺริเยสุ อคุตฺตทฺวารตาติ "ตตฺถ กตมา อินฺทฺริเยสุ อคุตฺตทฺวารตา. อิเธกจฺโจ จกฺขุนา รูปํ ทิสฺวา นิมิตฺตคฺคาหี โหตี"ติ ๑- อาทินา นเยน วิตฺถาริโต อินฺทฺริยสํวรเภโท. โภชเน อมตฺตญฺญุตาติ "ตตฺถ กตมา โภชเน อมตฺตญฺญุตา. อิเธกจฺโจ อปฺปฏิสงฺขา อโยนิโส อาหารํ อาหาเรติ ทวาย มทาย มณฺฑนาย วิภูสนาย. ยา ตตฺถ อสนฺตุฏฺฐิตา อมตฺตญฺญุตา อปฺปฏิสงฺขา โภชเน"ติ ๒- เอวํ อาคโต โภชเน อมตฺตญฺญุภาโว. อนนฺตรทุโก วุตฺตปฏิปกฺขนเยเนว เวทิตพฺโพ.
ปฏิสงฺขานพลนฺติ "ตตฺถ กตมํ ปฏิสงฺขานพลํ. ยา ปญฺญา ปชานนา"ติ ๓- เอวํ วิตฺถาริตํ อปฺปฏิสงฺขาย อกมฺปนญาณํ. ภาวนาพลนฺติ ภาเวนฺตสฺส อุปฺปนฺนพลํ. อตฺถโต วิริยสมฺโพชฺฌงฺคสีเสน สตฺต โพชฺฌงฺคา โหนฺติ. วุตฺตมฺปิ เจตํ "ตตฺถ กตมํ ภาวนาพลํ. ยา กุสลานํ ธมฺมานํ อาเสวนา ภาวนา พหุลีกมฺมํ, อิทํ วุจฺจติ ภาวนาพลํ. สตฺตปิ โพชฺฌงฺคา ภาวนาพลนฺ"ติ. ๔-