อาวาเส มจฺฉริยํ. อาวาสมจฺฉริยํ. เตน สมนฺนาคโต ภิกฺขุ อาคนฺตุกํ ทิสฺวา "เอตฺถ เจติยสฺส วา สํฆสฺส วา ปริกฺขาโร ฐปิโต"ติอาทีนิ วตฺวา สํฆิกมฺปิ อาวาสํ นิวาเรติ. โส กาลํ กตฺวา เปโต วา อชคโร วา หุตฺวา นิพฺพตฺตติ. กุเล มจฺฉริยํ กุลมจฺฉริยํ. เตน สมนฺนาคโต ภิกฺขุ เตหิ เตหิ การเณหิ อตฺตโน อุปฏฺฐากกุเล อญฺเญสํ ปเวสนมฺปิ นิวาเรติ. ลาเภ มจฺฉริยํ ลาภมจฺฉริยํ. เตน สมนฺนาคโต ภิกฺขุ สํฆิกมฺปิ ลาภํ มจฺฉรายนฺโต ยถา อญฺเญ น ลภนฺติ, เอวํ กโรติ. วณฺเณ มจฺฉริยํ วณฺณมจฺฉริยํ. วณฺโณติ เจตฺถ สรีรวณฺโณปิ คุณวณฺโณปิ เวทิตพฺโพ. ปริยตฺติธมฺเม มจฺฉริยํ ธมฺมมจฺฉริยํ. เตน สมนฺนาคโต ภิกฺขุ "อิมํ ธมฺมํ ปริยาปุณิตฺวา เอโส มํ อภิภวิสฺสตี"ติ อญฺญสส น เทติ. โย ปน ธมฺมานุคฺคเหน วา ปุคฺคลานุคฺคเหน วา น เทติ, น ตํ มจฺฉริยํ. (๕)

จิตฺตํ นิวาเรนฺติ ปริโยนทฺธนฺตีติ นีวรณานิ. กามจฺฉนฺโท นีวรณปฺปตฺโต อรหตฺตมคฺควชฺโฌ. กามราคานุสโย กามราคสญฺโญชนปฺปตฺโต อนาคามิมคฺควชฺโฌ. ถีนํ จิตฺตเคลญฺญํ. มิทฺธํ ขนฺธตฺตยเคลญฺญํ. อุภยมฺปิ อรหตฺตมคฺควชฺฌํ. ตถา อุทฺธจฺจํ. กุกฺกุจฺจํ อนาคามิมคฺควชฺฌํ. วิจิกิจฺฉา ปฐมมคฺควชฺฌา. (๖)

สญฺโญชนานีติ พนฺธนานิ. เตหิ ปน พนฺเธสุ ปุคฺคเลสุ รูปารูปภเว นิพฺพตฺตา โสตาปนฺนสกทาคามิโน อนฺโต พนฺธา ๑- พหิ สยิตา นาม. เตสญฺหิ กามภเว พนฺธนํ. กามภเว อนาคามิโน พหิ พนฺธา อนฺโต สยิตา นาม. เตสญฺหิ รูปารูปภเว พนฺธนํ. กามภเว โสตาปนฺนสกทาคามิโน อนฺโต พนฺธา อนฺโต สยิตา นาม. รูปารูปภเว อนาคามิโน พหิ พนฺธา พหิ สยิตา นาม. ขีณาสโว สพฺพตฺถ อพนฺธโน. (๗-๘)