สิกฺขิตพฺพํ ปทํ สิกฺขาปทํ. สิกฺขาโกฏฺฐาโสติ อตฺโถ. สิกฺขาย วา ปทํ สิกฺขาปทํ, อธิจิตฺตอธิปญฺญาสิกฺขาย อธิคมูปาโยติ อตฺโถ. อยเมตฺถ สงฺเขโป. วิตฺถารโต ปน สิกฺขาปทกถา วิภงฺคปฺปกรเณ สิกฺขาปทวิภงฺเค อาคตาเยว. (๙)

อภพฺพฏฺฐาทิปญฺจกวณฺณนา

[๓๑๖] "อภพฺโพ อาวุโส ขีณาสโว ภิกฺขุ สญฺจิจฺจ ปาณนฺ"ติอาทิ เทสนาสีสเมว, โสตาปนฺนาทโยปิ ปน อภพฺพา. ปุถุชฺชนขีณาสวานํ นินฺทาปสํสตฺถมฺปิ เอวํ วุตฺตํ. ปุถุชฺชโน นาม คาเรโยฺห, มาตุฆาตาทีนิปิ กโรติ. ขีณาสโว ปน ปาสํโส, กุนฺถกิปีลกฆาตาทีนิปิ ๒- น กโรตีติ. (๑๐)

พฺยสเนสุ พฺยสตีติ ๓- พฺยสนํ, หิตสุขํ ขิปติ วิทฺธํเสตีติ อตฺโถ. ญาตีนํ พฺยสนํ ญาติพฺยสนํ, โจรโรคภยาทีหิ ญาติวินาโสติ อตฺโถ. โภคานํ พฺยสนํ โภคพฺยสนํ. ราชโจราทิวเสน โภควินาโสติ อตฺโถ. โรโคเอว พฺยสนํ โรคพฺยสนํ, โรโค หิ อาโรคฺยํ พฺยสติ วินาเสตีติ พฺยสนํ, สีลสฺส พฺยสนํ