Yadidaṃ kusalesu dhammesūti ettha yadidanti nipātamattaṃ. Kusalesu dhammesu bhagavatā uttaritaro natthīti ayamettha attho. Iti bhagavāva kusalesu dhammesu anuttaroti dassento "imināpi kāraṇena evaṃ pasanno ahaṃ bhante bhagavatī"ti dīpeti.

Āyatanapaṇṇattidesanāvaṇṇanā

[146] Ito paresu aparaṃ panāti ādīsu visesamattameva vaṇṇayissāma. Purimavārasadisaṃ pana vuttanayeneva veditabbaṃ.

Āyatanapaṇṇattīsūti āyatanapaññāpanāsu. Idāni tā āyatanapaññattiyo dassento chayimāni bhanteti ādimāha. Āyatanakathā panesā visuddhimagge vitthārena kathitā, tena na taṃ vitthārayissāma, tasmā tattha vuttanayeneva sā vitthārato veditabbā. Etadānuttariyaṃ bhante āyatanapaṇṇattīsūti yā ayaṃ āyatanapaṇṇattīsu ajjhattikabāhiravavaṭṭhānādivasena evaṃ desanā, etadānuttariyaṃ. Sesaṃ vuttanayameva.