[12] Yena aceloti bhagavato vattaṃ katvā yena acelo kaḷāramajjhako tenupasaṅkami. Pañhaṃ apucchīti gambhīraṃ tilakkhaṇāhataṃ pañhaṃ pucchi. Na sampāyāsīti na sammā ñāṇagatiyā sampāyāsi, andho viya visamaṭṭhāne tattha tattheva pakkhali. Pañhānaṃ neva ādiṃ, na pariyosānamaddasa. Athavā "na sampāyāsī"ti na sampādesi, sampādetvā kathetuṃ nāsakkhi. Asampāyantoti kupurakkhīni parivattetvā olokento "asikkhitakassa santike vuṭṭhosi, anokāsepi pabbajito pañhaṃ pucchanto vicarasi, apehi mā etasmiṃ ṭhāne aṭṭhāsī"ti vadanto. Kopañca dosañca appaccayañca pātvākāsīti kuppanākāraṃ kopaṃ, dussanākāraṃ dosaṃ, atuṭṭhākārabhūtaṃ domanassasaṅkhātaṃ apaccayañca pākaṭamakāsi. Āsādiyimhaseti āsādayimhā ghaṭṭayimhā. Mā vata no bho ahosīti aho vata me na bhaveyya. Maṃ vata no ahosītipi pāṭho. Tattha manti sāmivacanaṭṭhe upayogavacanaṃ, ahosi vata nu mamāti attho. Evañca pana cintetvā ukkuṭikaṃ nisīditvā "khamatha me bhante"ti taṃ khamāpesi. Sopi ito paṭṭhāya aññaṃ kiñci pañhaṃ nāma na pucchissasīti. Āma na pucchissāmīti. Yadi evaṃ gaccha, khamāpemi teti taṃ uyyojesi.

[13] Parihitoti paridahito nivatthavattho. Sānucārikoti anucārikā vuccati bhariyā, sahānucārikāya sānucāriko, taṃ taṃ brahmacārivattaṃ pahāya sabhariyoti attho. Odanakummāsanti surāmaṃsato atirekaṃ odanaṃpi kummāsaṃpi bhuñjamāno. Yasā nihīnoti yaṃ lābhaggayasaggaṃ patto, tato parihīno hutvā.

[14] "kataṃ hoti uttarimanussadhammā iddhipāṭihāriyan"ti idha sattavattapadātikkamavasena satta pāṭihāriyāni veditabbāni.