Pāli panettha "katamo ca puggalo ubhatobhāgavimutto, idhekacco puggalo aṭṭha vimokkhe kāyena phusitvā viharati, paññāya cassa disvā āsavā parikkhīṇā honti ayaṃ vuccati puggalo ubhatobhāgavimuttoti." evaṃ aṭṭhavimokkhalābhino vasena āgatā.

Paññāvimuttoti paññāya vimutto, so sukkhavipassako ca, catūhi jhānehi vuṭṭhāya arahattappattā cattāro cāti imesaṃ vasena pañcavidhova hoti.

Pāli panettha aṭṭhavimokkhapaṭipakkhepavaseneva āgatā. Yathāha "naheva kho aṭṭha vimokkhe kāyena phusitvā viharati, paññāya cassa disvā āsavā parikkhīṇā honti. Ayaṃ vuccati puggalo paññāvimutto"ti.

Phuṭṭhantaṃ sacchikarotīti kāyasakkhi, so jhānaphassaṃ paṭhamaṃ phusati, pacchā nirodhaṃ nibbānaṃ sacchikaroti, so sotāpattiphalaṭṭhaṃ ādiṃ katvā yāva arahattamaggaṭṭhā chabbidho hotīti veditabbo. Tenevāha "idhekacco puggalo aṭṭha vimokkhe kāyena phusitvā viharati, paññāya cassa disvā ekacce āsavā parikkhīṇā honti. Ayaṃ vuccati puggalo kāyasakkhī"ti.