Kalyāṇapaṭibhāṇoti vakkaraṇasampanno ceva hoti paṭibhāṇasampanno ca. Yuttapaṭibhāṇo kho pana hoti no muttapaṭibhāṇo. Sīlasamācārasmiñhi ṭhitabhikkhu muttapaṭibhāṇo na hoti, yuttapaṭibhāṇo pana hoti vaṅgīsatthero viya. Gatimāti gamanasamatthāya paññāya samannāgato. Dhitimāti dhāraṇasamatthāya paññāya samannāgato. Matimāti ettha pana matīti paññāya nāmameva, tasmā paññavāti attho. Iti tīhipi imehi padehi paññāva kathitā. Tattha heṭṭhā samaṇadhammakaraṇavīriyaṃ kathitaṃ, idha buddhavacanaggaṇhaṇavīriyaṃ. Tathā heṭṭhā vipassanāpaññā kathitā, idha buddhavacanaggaṇhaṇapaññā. Na ca kāmesu giddhoti vatthukāmakilesakāmesu agiddho. Sato ca nipako cāti abhikkantādīsu sattasu ṭhānesu satiyā ceva ñāṇena ca samannāgato careyyāti attho. Nepakkanti paññā, tāya samannāgatattā nipakoti vutto. Sesamidhāpi purimanayeneva yojetabbaṃ.

Anusāsanavidhādesanāvaṇṇanā

[154] Paccattaṃ yonisomanasikārāti attano upāyamanasikārena. Yathānusiṭṭhaṃ tathā paṭipajjamānoti yathā mayā anusiṭṭhaṃ anusāsanī dinnā, tathā paṭipajjamāno. Tiṇṇaṃ saññojanānaṃ parikkhayāti ādi vuttatthameva. Sesamidhāpi purimanayeneva yojetabbaṃ.