"bāhirakāpi isayo dhārenti, no ca kho te jānanti imassa kammassa katattā imaṃ lakkhaṇaṃ paṭilabhatī"ti kasmā āha. Atthuppattiyā anurūpattā. Idañhi suttaṃ saatthuppattikaṃ. Sā panassa atthuppatti kattha samuṭṭhitā? antogāme manussānaṃ antare.

Tadā kira sāvatthivāsino attano attano gehesu ca gehadvāresu ca saṇṭhāgārādīsu ca nisīditvā kathaṃ samuṭṭhāpesuṃ "bhagavato asītianubyañjanāni byāmappabhā dvattiṃsamahāpurisalakkhaṇāni, yehi ca bhagavato kāyo, sabbaphāliphullo

Bhagavato ca iminā nāma kammena idaṃ lakkhaṇaṃ nibbattanti kathitaṃ natthi, yāguuḷuṅkamattampi pana kaṭacchubhattamattaṃ vā pubbe dinnapaccayā evaṃ uppajjatīti bhagavatā vuttaṃ. Kiṃnu kho satthā kammaṃ akāsi, yenassa imāni lakkhaṇāni nibbattantī"ti.

Athāyasmā ānando antogāme caranto imaṃ kathāsallāpaṃ sutvā katabhattakicco vihāraṃ āgantvā satthu vattaṃ katvā vanditvā ṭhito "mayā bhante antogāme ekā kathā sutā"ti āha. Tato bhagavatā "kinte ānanda sutan"ti vutte sabbaṃ ārocesi. Satthā therassa vacanaṃ sutvā parivāretrā nisinne bhikkhū āmantetvā "dvattiṃsimāni bhikkhave mahāpurisassa mahāpurisalakkhaṇānī"ti paṭipāṭiyā lakkhaṇāni dassetvā yena kammena yaṃ nibbattaṃ, tassa dassanatthaṃ evamāha.