@4 cha.Ma. hatthiassamigamahisavānarādibhūtopi, i. hatthiassamigamahisavānarādibhūtopi

Daḷhasamādānoti thiraggahaṇo. Kusalesu dhammesūti dasakusalakammapathesu. Avatthitasamādānoti niccalaggahaṇo anivattitaggahaṇo. Mahāsattassa hi akusalakammato aggiṃ patvā kukkuṭapattaṃ viya cittaṃ paṭikuṭṭati, kusalaṃ patvā vitānaṃ viya pasāriyati. Tasmā daḷhasamādāno hoti anivattitasamādāno. Na sakkā kenaci samaṇena vā brāhmaṇena vā devena vā mārena vā brahmunā vā kusalasamādānaṃ visajjāpetuṃ.

Tatrimāni vatthūni:- pubbe kira mahāpuriso kalandakayoniyaṃ nibbatti. Atha deve vuṭṭhe ogho āgantvā kulāvakaṃ gahetvā samuddameva pavesesi. Mahāpuriso "puttake nīharissāmī"ti naṅguṭṭhaṃ temetvā temetvā samuddato udakaṃ bahi khipati. Sattame divase sakko āvajjitvā tattha āgamma "kiṃ karosī"ti pucchi. So tassa ārocesi. Sakko mahāsamuddato udakassa dunnīharaṇīyabhāvaṃ kathesi. Bodhisatto tādisena kusītena saddhiṃ kathetuṃpi na vaṭṭati. "mā idha tiṭṭhā"ti apasādeti. Sakko "anomapurisena gahitaggahaṇaṃ na sakkā visajjāpetun"ti tuṭṭho tassa puttake ānetvā adāsi. Mahājanakakālepi mahāsamuddaṃ taramāno "kasmā mahāsamuddaṃ tarasī"ti devatāya puṭṭho "pāraṃ gantvā kulasantake raṭṭhe rajjaṃ gahetvā dānaṃ dātuṃ tarāmī"ti āha. Tato devatāya "ayaṃ mahāsamuddo gambhīro ceva puthulo ca, kadā naṃ tarissatī"ti vutte so āha "taveso mahāsamuddasadiso, mayhaṃ pana ajjhāsayaṃ āgamma khuddakamātikā viya khāyati. Tvaṃyeva maṃ dakkhissasi samuddaṃ taritvā samuddapārato dhanaṃ āharitvā kulasantake raṭṭhe rajjaṃ gahetvā dānaṃ dadamānan"ti. Devatā "anomapurisena gahitaggahaṇaṃ na sakkā visajjāpetun"ti bodhisattaṃ āliṅgitvā haritvā uyyāne nipajjāpesi. So chattaṃ ussāpetvā divase divase pañcasatasahassapariccāgaṃ katvā aparabhāge nikkhamma pabbajito. Evaṃ mahāsatto na sakkā kenaci samaṇena vā .pe. Brahmunā vā