@3 cha.Ma. abbudavirahitaṃ, i. abbudarahitaṃ 4 Sī., i. avikkhambhiyo

Ettāvatā bhagavatā kammañca kammasarikkhakañca lakkhaṇañca lakkhaṇānisaṃso ca vutto hoti. Kammaṃ nāma satasahassakappādhikāni cattāri asaṅkheyyāni daḷhaviriyena hutvā katakammaṃ. Kammasarikkhakaṃ nāma daḷhena katakammabhāvaṃ sadevako loko jānātūti nibbattaṃ supatiṭṭhitapādamahāpurisalakkhaṇaṃ. Lakkhaṇaṃ nāma supatiṭṭhitapādatā. Lakkhaṇānisaṃso nāma paccatthikehi avikkhambhanīyatā.

[203] Tatthetaṃ vuccatīti tattha vutte kammādibhede aparaṃpi idaṃ vuccati, gāthābandhaṃ sandhāya vuttaṃ. Etā pana gāthā porāṇakattherā "ānandattherena ṭhapitā vaṇṇanāgāthā"ti vatvā gatā. Aparabhāge therā "ekapadiko atthuddhāro"ti āhaṃsu.

Tattha sacceti vacīsacce. Dhammeti dasakusalakammapathadhamme. Dameti indriyadamane. Saṃyameti sīlasaṃyame. "soceyyasīlālayūposathesu cā"ti ettha kāyasoceyyādi tividhaṃ soceyyaṃ. Ālayabhūtaṃ sīlameva sīlālayo. Uposathakammaṃ uposatho. Ahiṃsāyāti avihiṃsāya. Samattamācarīti sakalamācari.