Kojavakambalapaccattharaṇamañcapaṭipādakehi saddhiṃ antamaso makuṇasodhanadaṇḍakaṃ heṭṭhimāni ca satta tassa parivāraṃ katvā adāsi. Āvasathaṃ dentopi na gehamattameva adāsi, athakho naṃ mālākammalatākammapaṭimaṇḍitaṃ supaññattamañcapīṭhaṃ kāretvā heṭṭhimāni aṭṭha tassa parivāraṃ katvā adāsi. Padīpeyyanti padīpatelaṃ. Taṃ dento cetiyaṅgaṇe bodhiyaṅgaṇe dhammassavanagge vasanagehe potthakavācanaṭṭhāne ca imimā dīpaṃ jālāpethāti na suddhatelameva adāsi, vaṭṭikapallakatelabhājanādīhi saddhiṃ heṭṭhimāni nava tasseva parivāraṃ katvā adāsi. Suvibhattantarānīti suvibhattaantarāni.

Rājānoti abhisittā khattiyā. Bhogikāti bhojakā. Kumārāti rājakumāRā. Idha kammaṃ nāma saparivāradānaṃ. Kammasarikkhakaṃ nāma saparivāraṃ katvā dānaṃ adāsīti iminā kāraṇena sadevako loko jānātūti nibbattaṃ cakkalakkhaṇaṃ. Lakkhaṇaṃ nāma tadeva cakkalakkhaṇaṃ. Ānisaṃso mahāparivāratā.

[205] Tatthetaṃ vuccatīti imā tadatthaparidīpanā gāthā vuccanti. Duvidhā hi gāthā hoti tadatthaparidīpanā visesatthaparidīpanā ca. Tattha pāliyaṃ āgatameva atthaṃ paridīpayamānā tadatthaparidīpanā nāma. Pāliyaṃ anāgataṃ paridīpayamānā visesatthaparidīpanā nāma. Imā pana tadatthaparidīpanā. Tattha pureti pubbe. Puratthāti tasseva vevacanaṃ. Purimāsu jātīsūti imissā jātiyā pubbe katakammapaṭikkhepadīpanaṃ. Ubbegauttāsabhayāpanūdanoti ubbegabhayassa ceva uttāsabhayassa ca apanūdano. Ussukoti adhimutato.

Satapuññalakkhaṇanti satena satena puññakammena nibbattaṃ ekekalakkhaṇaṃ. Evaṃ sante yo koci buddho bhaveyyāti na rocayiṃsu, anantesu pana cakkavāḷesu sabbe sattā ekekaṃ kammaṃ satakkhattuṃ kareyyuṃ, ettakehi janehi katakammaṃ bodhisatto ekova ekekaṃ sataguṇaṃ katvā nibbatto. Tasmā "satapuññalakkhaṇo"ti imamatthaṃ rocayiṃsu. Manussāsurasakkarakkhasāti manussā ca asurā ca sakkā ca rakkhasā ca.