Subhujoti sundarabhujo. Susūti mahallakakālepi taruṇarūPo. Susaṇṭhitoti susaṇṭhānasampanno mudutalunaṅguliyassāti mudū talunā ca aṅguliyo assa. Tībhīti tīhi. Purisavaraggalakkhaṇehīti purisavarassa aggalakkhaṇehi. Cirayāpanāyāti ciraṃ yāpanāya, dīghāyukabhāvāya.

Ciraṃ yāpetīti ciraṃ yāpeti. Cirataraṃ pabbajati yadi tato hīti yadi tato hi cirataraṃ yāpeti yadi pabbajatīti attho. Yāpayāti ca vasiddhibhāvanāyāti vasippatto hutvā iddhibhāvanāya yāpeti.

Sattussadatālalakkhaṇavaṇṇanā (6)

[208] Rasitānanti rasasampannānaṃ. "khādanīyānan"tiādīsu khādanīyāni nāma piṭṭhakhajjakādīni. Bhojanīyānanti pañca bhojanāni. Sāyanīyānanti sāyitabbāni sappinavanītādīni. Lehanīyānanti nillehitabbāni piṭṭhapāyāsādīni. Pānānanti aṭṭha pānakāni.