Satta cussadeti satta ca ussade. Tadatthajotakanti khajjabhojjādijotakaṃ, tesaṃ lābhasaṃvattanikanti attho. Pabbajjaṃpi cāti pabbajamānopi ca. Tadādhigacchatīti taṃ adhigacchati. Lābhiruttamanti lābhī uttamaṃ.

Karacaraṇamudujālatālakkhaṇavaṇṇanā (7-8)

[210] Dānenātiādīsu ekacco dāneneva saṅgaṇhitabbo hoti, taṃ dānena saṅgahesi. Pabbajitānaṃ pabbajitaparikkhāraṃ, gihīnaṃ gihiparikkhāraṃ adāsi.

Peyyavajjenāti ekacco hi "ayaṃ dātabbaṃ dānaṃ nāma deti, ekena pana vacanena sabbaṃ makkhetvā nāseti, kiṃ etassa dānan"ti vattā hoti. Ekacco "ayaṃ kiñcāpi dānaṃ na deti, kathento pana telena viya makkheti. Eso detu vā mā vā, vacanameva tassa sahassaṃ agghatī"ti vatvā hoti. Evarūpo puggalo dānaṃ na paccāsiṃsati, piyavacanameva paccāsiṃsati. Taṃ piyavacanena saṅgahesi.