@nidaṃsesi 4 cha.Ma., i. nidaṃsanakathaṃ 5 Sī. adhogatasaṅkhapādo 6 Sī. adhogatalomo Maṃsalohitācitāti maṃsena ceva lohitena ca ācitā. Tacotthaṭāti tacena pariyonaddhā nigguḷhā. Vajatīti gacchati. Anomanikkamoti anomavihārī seṭṭhavihārī.

Eṇijaṅghalakkhaṇavaṇṇanā (11)

[214] Sippaṃ vātiādīsu sippaṃ nāma dvepi sippāni hīnañca sippaṃ ukkaṭṭhañca sippaṃ. Hīnaṃ nāma sippaṃ naḷakārasippaṃ kumbhakārasippaṃ pesakārasippaṃ nhānasippaṃ. Ukkaṭṭhaṃ nāma sippaṃ lekhā muddhāgaṇanā. Vijjanti ahivijjādi anekavidhā. Caraṇanti pañcasīlaṃ dasasīlaṃ pāṭimokkhasaṃvarasīlaṃ. Kammanti kammassakatajānanapaññā. Kiliseyyunti kilameyyuṃ. Antevāsikavattaṃ nāma dukkhaṃ, taṃ nesaṃ mā ciraṃ ahosīti cintesi.

Rājārahānīti rañño anurūpāni hatthiassādīni, tāniyeva rañño senāya aṅgabhūtattā rājaṅgānīti vuccanti, rājūpabhogānīti rañño upabhogaparibhogabhaṇḍāni, tāni ceva sattaratanāni ca. Rājānucchavikānīti rañño anucchavikāni. Tesaṃyeva sabbesaṃ idaṃ gahaṇaṃ. Samaṇārahānīti samaṇānaṃ anurūpāni ticīvarādīni. Samaṇaṅgānīti samaṇānaṃ koṭṭhāsabhūtā catasso parisā. Samaṇūpabhogānīti samaṇānaṃ upabhogaparikkhāRā. Samaṇānucchavikānīti tesaṃyeva adhivacanaṃ.