Atthānusiṭṭhīsu pariggahesu cāti ye atthānusāsanesu pariggahā atthānatthapariggāhakāni ñāṇāni, tesūti attho.

Suvaṇṇavaṇṇalakkhaṇavaṇṇanā (13)

[218] Akkodhanoti na anāgāmimaggena kodhassa pahīnattā, athakho sacepi me kodho uppajjeyya, khippameva naṃ paṭivinodeyyanti evaṃ akodhavasikattā. Nābhisajjīti kuṭilakuṭilakaṇṭhako viya tattha tattha mammaṃ tudanto viya na laggi. Na kuppi na byāpajjītiādīsu pubbuppattiko koPo. Tato balavataro byāpādo. Tato balavatarā patiṭṭhiyanā. Taṃ sabbaṃ akaronto na kuppi na byāpajji na patiṭṭhayi. Appaccayanti domanassaṃ. Pātvākāsīti na kāyavikārena vā vacīvikārena vā pākaṭamakāsi.

Idha kammaṃ nāma dīgharattaṃ akodhanatā ceva sukhumattharaṇādidānañca. Kammasarikkhakaṃ nāma kodhanassa hi chavivaṇṇo āvilo hoti mukhaṃ duddasiyaṃ vatthacchādanasadisañca maṇḍanaṃ nāma natthi. Tasmā yo kodhano ceva vatthacchādanānañca adātā, so iminā kāraṇenassa jano kodhanādibhāvaṃ jānātūti dubbaṇṇo hoti dussaṇṭhāno. Akodhanassa pana mukhaṃ virocati, chavivaṇṇo vippasīdati. Sattā hi catūhi kāraṇehi pāsādikā honti āmisadānena vā vatthadānena vā sammajjanena vā akodhanatāya vā. Iminā cattāripi kāraṇāni dīgharattaṃ tathāgatena katāneva. Tenassa imesaṃ katabhāvaṃ sadevako loko iminā kāraṇena jānātūti suvaṇṇavaṇṇaṃ mahāpurisalakkhaṇaṃ nibbattati. Lakkhaṇaṃ nāma idameva lakkhaṇaṃ. Sukhumattharaṇādilābhitā ānisaṃso.