Amittatāpanāti amittāpanaṃ tāpanā. Gihissa pītijananāti gihibhūtassa sato pītijananā.

Parimaṇḍalaanonamajaṇṇuparimasanalakkhaṇavaṇṇanā (15-16)

[222] Samaṃ jānātīti "ayaṃ tārukkhasamo ayaṃ pokkharasātisamo"ti evaṃ tena tena samaṃ jānāti. Sāmaṃ jānātīti sayaṃ jānāti. Purisaṃ jānātīti "ayaṃ seṭṭhasammato"ti purisaṃ jānāti. Purisavisesaṃ jānātīti muggaṃ māsena samaṃ akatvā guṇavisiṭṭhassa visesaṃ jānāti. Ayamidamarahatīti ayaṃ puriso idaṃ nāma dānasakkāraṃ arahati. Purisavisesakaro pure ahosīti purisavisesaṃ ñatvā kārako ahosi. Yo yaṃ arahati, tassevetaṃ adāsi. Yo hi kahāpaṇārahassa aḍḍhaṃ deti, so parassa aḍḍhaṃ nāseti. Yo dve kahāpaṇe deti, so attano kahāpaṇaṃ nāseti. Tasmā idaṃ ubhayaṃpi akatvā yo yaṃ arahati, tassa tadeva adāsi. Saddhādhanantiādīsu sampattipaṭilābhaṭṭhena saddhādīnaṃ dhanabhāvo veditabbo.