[226] Samābhivāhiniyoti yathā tilaphalamattampi jivhagge ṭhapitaṃ sabbattha pharati, evaṃ samā hutvā vahanti. Idha kammaṃ nāma arogakaraṇaṃ kammaṃ. Kammasarikkhakaṃ nāma pāṇiādīhi pahāraladdhassa tattha tattha lohitaṃ saṇṭhāti, gaṇṭhi gaṇṭhi hutvā anto ca pubbaṃ gaṇhāti, anto ca bhijjati, evaṃ so bahurogo hoti. Tathāgatena pana dīgharattaṃ imaṃ ārogyakaraṇakammaṃ kataṃ. Tadassa sadevako loko iminā kāraṇena jānātūti ārogyakaraṇaṃ rasaggasaggilakkhaṇaṃ nibbattati. Lakkhaṇaṃ nāma idameva lakkhaṇaṃ. Appābādhatā ānisaṃso.

[227] Maraṇavadhenāti "etaṃ māretha etaṃ ghātethā"ti evaṃ āṇattena maraṇavadhena. Ubbādhanāyāti bandhanāgārappavesanena. Ojasāti ujasāti.

Abhinīlanettagopakhumalakkhaṇavaṇṇanā (21-22)

[228] Na ca visaṭanti kakkaṭako viya akkhīni nīharitvā na kodhavasena pekkhitā ahosi. Na ca visāvīti vaṅkakkhikoṭiyā pekkhitāpi nāhosi.