Rattimuṭṭhānadessināti rattiṃ anuṭṭhānasīlena. Atisāyamidaṃ ahūti idaṃ atisāyaṃ jātanti ye evaṃ vatvā kammaṃ na karonti. Iti vissaṭṭhakammanteti evaṃ vatvā pariccattakammante. Atuthā accenti māṇaveti evarūpe puggale atthā atikkamanti, tesu na tiṭṭhanti.

Tiṇā bhiyyoti tiṇatopi uttariṃ. So sukhaṃ na vihāyatīti so puriso sukhaṃ na jahati, sukhasamaṅgīyeva hoti. Iminā kathāmaggena imamatthaṃ dassesi "gihibhūtena satā ettakaṃ kammaṃ na kātabbaṃ, karontassa vuḍḍhi nāma natthi. Idhalokaparaloke garahameva pāpuṇātī"ti.

Mittapaṭirūpakavaṇṇanā

[254] Idāni yo evaṃ karoto anattho uppajjati, aññāni vā pana yāni kānici bhayāni ye keci upaddavā ye keci upasaggā, sabbe te bālaṃ nissāya uppajjanti. Tasmā "evarūpā bālā na sevitabbā"ti bāle mittapaṭirūpake amitte dassetuṃ cattārome gahapatiputta amittāti ādimāha. Tattha aññadatthuharoti sayaṃ tucchahattho āgantvā ekaṃsena yaṃkiñca haratiyeva. Vacīparamoti vacanaparamo vacanamatteneva dāyako kārako viya hoti. Anuppiyabhāṇīti anuppiyaṃ bhaṇati. Apāyasahāyoti bhogānaṃ apāyesu sahāyo hoti.