[264] Abhavenassa na nandatīti tassa abhavena avaḍḍhiyā puttadārassa vā parijanassa vā tathārūpaṃ pārijuññaṃ disvā vā sutvā vā na nandati, anattamano hoti. Bhavenāti vaḍḍhiyā tathārūpassa sassādisampattiṃ vā issariyapaṭilābhaṃ vā disvā vā sutvā vā nandati, attamano hoti. Avaṇṇaṃ bhaṇamānaṃ nivāretīti "asuko virūpo na pāsādiko dujjātiko dussīlo"ti vā vutte "evaṃ mā bhaṇi, rūpavā ca so pāsādiko ca sujāto ca sīlasampanno cā"ti ādīhī vacanehi paraṃ attano sahāyassa avaṇṇaṃ bhaṇamānaṃ nivāreti. Vaṇṇaṃ bhaṇamānaṃ pasaṃsatīti "aho suṭṭhu vadasi, subhāsitaṃ tayā, evametaṃ, esa puriso rūpavā pāsādiko sujāto sīlasampanno"ti evaṃ attano sahāyakassa paraṃ vaṇṇaṃ bhaṇamānaṃ pasaṃsati.

[265] Jalaṃ aggiva bhāsatīti rattiṃ pabbatamatthake jalamāno aggi viya virocati.

Bhoge saṃharamānassāti attānaṃpi paraṃpi apīḷetvā dhammena samena bhoge sampiṇḍentassa rāsiṃ karontassa. Bhamarasseva iriyatoti yathā bhamaro pupphānaṃ vaṇṇagandhaṃ aheṭhayaṃ tuṇḍenapi pakkhehipi rajaṃ āharitvā anupubbena cakkappamāṇaṃ madhupaṭalaṃ karoti, evaṃ anupubbena mahantaṃ bhogarāsiṃ karontassa. Bhogā sannicayaṃ yantīti tassa bhogā nicayaṃ gacchanti. Kathaṃ? anupubbena upacikāhi saṃvaḍḍhiyamāno vammiko viya. Tenāha "vammikovūpacīyatīti. Yathā vammiko upaciyati, evaṃ nicayaṃ yantīti attho. Samāhatvāti samāharitvā. Alamattoti yuttasabhāvo samattho vā pariyattarūpo gharāvāsaṃ saṇṭhapetuṃ.