Paṭicchannā hotīti yaṃ puratthimadisato bhayaṃ āgaccheyya, yathā taṃ nāgacchati, evaṃ pihitā hoti. Sace hi puttā vippaṭipannā assu, mātāpitaro daharakālato paṭṭhāya jagganādīhi sammāpaṭipannā, ete dārakā, mātāpitūnaṃ appaṭirūpāti etaṃ bhayaṃ āgaccheyya. Puttā sammāpaṭipannā, mātāpitaro vippaṭipannā, mātāpitaro puttānaṃ nānurūpāti etaṃ bhayaṃ āgaccheyya. Ubhosu vippaṭipannesu duvidhaṃpi taṃ bhayaṃ hoti. Sammāpaṭipannesu sabbaṃ na hoti. Tena vuttaṃ "paṭicchannā hoti khemā appaṭibhayā"ti.

Evañca pana vatvā bhagavā siṅgālakaṃ etadavoca "na kho te gahapatiputta pitā lokasammataṃ puratthimaṃ disaṃ namassāpeti. Mātāpitaro pana puratthimadisāsadise katvā namassāpeti. Ayañhi te pitarā puratthimā disā akkhātā, no aññā"ti.

[268] Uṭṭhānenāti āsanā uṭṭhānena. Antevāsikena hi ācariyaṃ dūratova āgacchantaṃ disvā āsanā vuṭṭhāya paccuggamanaṃ katvā hatthato bhaṇḍakaṃ gahetvā āsanaṃ paññapetvā nisīdāpetvā vījanapādadhovanapādamakkhanāni kātabbāni. Taṃ sandhāya vuttaṃ "uṭṭhānenā"ti. Upaṭṭhānenāti divasassa tikkhattuṃ upaṭṭhānagamanena. Sippuggahaṇakāle pana avassameva gantabbaṃ hoti. Sussusāyāti saddahitvā savanen asaddahitvā suṇanto hi visesaṃ nādhigacchati.

Antevāsikena hi ācariyassa pātova uṭṭhāya mukhodakadantakaṭṭhaṃ datvā bhattakiccakālepi pānīyaṃ gahetvā paccuṭṭhānādīni katvā vanditvā gantabbaṃ. Kiliṭṭhavatthādīni dhovitabbāni, sāyaṃ nhānodakaṃ paccupaṭṭhapetabbaṃ. Aphāsukakāle upaṭṭhātabbaṃ. Pabbajitenapi sabbaṃ antevāsikavattaṃ kātabbaṃ. Idaṃ sandhāya vuttaṃ "pāricariyāyā"ti. Sakkaccaṃ sippapaṭiggahaṇenāti sakkaccaṃ paṭiggahaṇaṃ nāma thokaṃ gahetvā bahū vāre sajjhāyakaraṇaṃ, ekapadaṃpi visuddhameva gahetabbaṃ.