Rahadoti udakarahado. Tatthāti yato uggacchati suriyo, tasmiṃ ṭhāne. Samuddoti yo so rahadoti vutto, so na añño, athakho samuddoti. Saritodakoti visaṭodako, saritā nānappakārā nadiyo assa udake paviṭṭhāti vā saritodako. Evantaṃ tattha jānantīti taṃ rahadaṃ tattha evaṃ jānanti. Kinti jānanti? samuddo saritodakoti evaṃ jānanti.

Itoti sineruto vā tesaṃ nisinnaṭṭhānato vā. Janoti ayaṃ mahājano. Ekanāmāti indanāmena ekanāmakā. Sabbesaṃ kira tesaṃ sakkassa devarañño nāmameva nāmaṃ akaṃsu. Asīti dasa eko cāti ekanavutijanā. Indanāmāti indo indoti evaṃnāmā. Buddhaṃ ādiccabandhunanti kilesaniddāpagamenapi buddhaṃ. Ādiccena samānagottatāyapi ādiccabandhunaṃ. Kusalena samekkhasīti anavajjena nipuṇena vā sabbaññutañāṇena mahājanaṃ olokesi. Amanussāpi taṃ vandantīti amanussāpi taṃ "sabbaññutañāṇena mahājanaṃ oloketī"ti vatvā vandanti. Sutaṃ netaṃ abhiṇhasoti etaṃ amhehi abhikkhaṇaṃ sutaṃ. Jinaṃ vandatha gotamaṃ, jinaṃ vandāma gotamanti amhehi puṭṭhā jinaṃ vandāma gotamanti vadanti.

[279] Yena petā pavuccantīti petā nāma kālakatā, te yena disābhāgena nīhariyantūti vuccanti. Pisuṇā piṭaṭhimaṃsikāti pisuṇavācā ceva piṭṭhimaṃsaṃ khādantā viya parammukhāgarahakā ca. Ete ca yena nīhariyantūti vuccanti, sabbepi hete dakkhiṇadvārena nīharitvā dakkhiṇato nagarassa dayhantu vā chindantu vā haññantu vāti evaṃ vuccanti. Ito sā dakkhiṇā disāti yena disābhāgena te petā ca pisuṇādikā ca nīhariyantūti vuccanti, ito sā dakkhiṇadisā. Itoti sineruto vā tesaṃ nisinnaṭṭhānato vā. Kumbhaṇḍānanti te kira devā mahodarā honti. Rahassaṅgampi ca nesaṃ kumbho viya mahantaṃ hoti. Tasmā kumbhaṇḍāti vuccanti.

[280] Yattha coggacchati suriyoti yasmiṃ disābhāge suriyo atthaṃ gacchati.