"../../bdpicture/chahi bhikkhave aṅgehi samannāgato sandhāno gahapati tathāgate niṭṭhaṅgato saddhamme iriyati. Katamehi chahi? buddhe aveccappasādena dhamme aveccappasādena saṃghe aveccappasādena ariyena sīlena ariyena ñāṇena

Imehi kho bhikkhave chahi aṅgehi samannāgato sandhāno gahapati tathāgate niṭṭhaṅgato saddhamme iriyatī"ti.

So pātoyeva uposathaṅgāni adhiṭṭhāya pubbaṇhasamaye buddhappamukhassa saṃghassa dānaṃ datvā bhikkhūsu vihāraṃ gatesu ghare khuddakamahallakānaṃ dārakānaṃ saddena ubbāḷho satthu santike "dhammaṃ sossāmī"ti nikkhanto. Tena vuttaṃ divādivasseva rājagahā nikkhamīti. Tattha divādivassevāti divassa divā nāma majjhantātikkamo, tasmiṃ divassāpi divābhūte atikkantamatte majjhantike nikkhamīti attho. Paṭisallīnoti tato tato rūpādigocarato cittaṃ paṭisaṃharitvā nilīno jhānaratisevanāvasena ekībhāvaṃ gato. Manobhāvanīyānanti manavaḍḍhakānaṃ. Ye ca āvajjato manasikaroto cittaṃ vinīvaraṇaṃ hoti unnamati vaḍḍhati.

[50] Unnādiniyāti ādīni poṭṭhapādasutte vitthāritanayeneva veditabbāni.