@4 cha.Ma. sabbapālaphullo 5 cha.Ma., i. parivārito na dissati Parisati nisinno pāveyyake malle bahudeva rattiṃ dhammiyā kathāya sandassetvā uyyojesi.

Ettha ca dhammakathā nāma saṇṭhāgāraanumodanapaṭisaṃyuttā pakiṇṇakakathā veditabbā. Tadā hi bhagavā ākāsagaṅgaṃ otārento viya paṭhavojaṃ ākaḍḍhento viya mahājambuṃ matthake gahetvā cālento viya yojanīyaṃ madhugaṇḍaṃ cakkayantena pīḷetvā madhupānaṃ pāyamāno viya ca pāveyyakānaṃ mallānaṃ hitasukhāvahaṃ pakiṇṇakakathaṃ kathesi.

[300] Tuṇhībhūtaṃ tuṇhībhūtanati yaṃ yaṃ disaṃ anuviloketi, tattha tattha tuṇhībhūtameva. Anuviloketvāti maṃsacakkhunā dibbacakkhunāti dvīhipi cakkhūhi tato tato viloketvā. Maṃsacakkhunā hi nesaṃ bahiddhā iriyāpathaṃ pariggahesi. Tattha ekassa bhikkhussāpi neva hatthakukkuccaṃ ahosi na pādakukkuccaṃ, na koci sīsamukkhipi, na kathaṃ kathesi, na niddāyanto nisīdi. Sabbepi tīhi sikkhāhi sikkhitā nivāte padīpasikhā viya niccalā nisīdiṃsu. Iti nesaṃ imaṃ iriyāpathaṃ maṃsacakkhunā pariggahesi. Ālokaṃ pana vaḍḍhayitvā dibbacakkhunā tesaṃ hadayarūpaṃ disvā abbhantaragataṃ sīlaṃ olokesi. So anekasatānaṃ bhikkhūnaṃ antokumbhiyaṃ jalamānaṃ padīpaṃ viya arahattūpagaṃ sīlaṃ addasa. Āraddhavipassakā hi te bhikkhū. Iti nesaṃ sīlaṃ disvā "imepi bhikkhū mayhaṃ anucchavikā, ahaṃpi imesaṃ anucchaviko"ti cakkhutalesu nimittaṃ ṭhapetvā bhikkhusaṃghaṃ oloketvā āyasmantaṃ sāriputtaṃ āmantesi "piṭṭhi me āgilāyatī"ti. Kasmā āgilāyati? bhagavato hi chabbassāni mahāpadhānaṃ padahantassa mahantaṃ kāyadukkhamahosi. Athassa aparabhāge mahallakakāle piṭṭhivāto uppajjati.