@4 Ma. upari 14/268/236 devadūtasutta
Kabaḷiṃkāraṃ āhāraṃ ārabbha cettha vivādo na kātabbo. Mukhe uppannakheḷopi hi tesaṃ āhārakiccaṃ sādheti. Kheḷopi hi niraye dukkhavedanīyo hutvā paccayo hoti, sagge sukhavedanīyo. Iti kāmabhave nippariyāyena cattāro āhāRā. Rūpārūpabhavesu ṭhapetvā asaññaṃ sesānaṃ tayo. Asaññānañceva avasesānañca paccayāhāroti. Iminā āhārena "sabbe sattā āhāraṭṭhitikā"ti ekaṃ pañhaṃ kathetvā "ayaṃ kho āvuso"ti evaṃ niyyātanaṃpi "atthi kho āvuso"ti puna uddharaṇaṃpi akatvā "sabbe sattā saṅkhāraṭṭhitikā"ti dutiyaṃ pañhaṃ visajjesi.
Kasmā pana na niyyātesi na uddharittha? tattha tattha niyyātiyamānepi Uddhariyamānepi pariyāpuṇituṃ vācetuṃ ca dukkhaṃ hoti, tasmā dve ekābaddhe katvā visajjesi. Imasmiṃpi visajjane heṭṭhā vuttapaccayova attano phalassa saṅkharaṇato saṅkhāroti vutto. Iti heṭṭhā āhārapaccayo kathito, idha saṅkhārapaccayoti ayamettha heṭṭhimato viseso. "heṭṭhā nippariyāyāhāro gahito, idha pariyāyāhāroti evaṃ gahite viseso pākaṭo bhaveyya, no ca gaṇhiṃsū"ti mahāsīvatthero āha. Indriyabaddhassapi hi anindriyabaddhassapi paccayo laddhuṃ vaṭṭati. Vinā paccayena dhammo nāma natthi. Tattha anindriyabaddhassa tiṇarukkhalatādino paṭhavīraso āporaso ca paccayo hoti. Deve avassante hi tiṇādīni milāyanti, vassante ca pana haritāni honti. Iti tesaṃ paṭhavīraso āporaso ca paccayo hoti. Indriyabaddhassa avijjā taṇhā kammaṃ āhāroti evamādayo paccayā, iti heṭṭhā paccayoyeva āhāroti kathito, idha saṅkhāroti ayamevettha viseso.
Ayaṃ kho āvusoti āvuso amhākaṃ satthārā mahābodhimaṇḍe nisīditvā sayaṃ sabbaññutañāṇena sacchikatvā ayaṃ ekadhammo desito. Tattha ekadhamme tumhehi sabbeheva saṅgāyitabbaṃ na vivaditabbaṃ. Yathayidaṃ brahmacariyanti yathā saṅgāyamānānaṃ tumhākaṃ idaṃ sāsanabrahmacariyaṃ addhaniyaṃ assa ciraṭṭhitikaṃ. Ekena hi bhikkhunā "atthi kho āvuso eko dhammo sammadakkhāto. Katamo Eko dhammo? sabbe sattā āhāraṭṭhitikā. Sabbe sattā saṅkhāraṭṭhitikā"ti kathite tassa kathaṃ sutvā añño kathessati. Tassapi aññoti evaṃ paramparakathāniyamena idaṃ brahmacariyaṃ ciraṃ tiṭṭhamānaṃ sadevakassa lokassa atthāya hitāya bhavissatīti ekakavasena dhammasenāpati sāriputtatthero sāmaggīrasaṃ dassesīti.