Rūpanti cattāro ca mahābhūtā catunnañca mahābhūtānaṃ upādāya rūpaṃ, taṃ sabbaṃpi ruppanaṭṭhena rūpaṃ. Tassa vitthārakathā visuddhimagge vuttanayeneva veditabbā.

Avijjāti dukkhādīsu añāṇaṃ. Ayampi vitthārato visuddhimagge kathitāyeva. Bhavataṇhāti bhavapaṭṭhanā. Yathāha "tattha katamā bhavataṇhā. Yo bhavesu bhavacchando"ti ādi.

Bhavadiṭaṭhīti bhavo vuccati sassataṃ, sassatavasena uppajjanakadiṭṭhi. Sāpi "tattha katamā bhavadiṭṭhi. `bhavissati Attā ca loko cā'ti yā evarūpā diṭṭhi diṭṭhigatan"ti ādinā nayena abhidhamme vitthāritā. Vibhavadiṭṭhīti vibhavo vuccati ucchedaṃ, ucchedavasena uppajjanakadiṭṭhi. Sāpi "tattha katamā vibhavadiṭṭhi. `na Bhavissati attā ca loko cā'ti yā evarūpā diṭṭhi diṭṭhigatan"ti ādinā nayena tattheva vitthāritā.

Ahirikanti "yaṃ na hiriyati hiriyitabbenā"ti evaṃ vitthāritā nillajjatā. Anottappanti yaṃ "na ottappati ottappitabbenā"ti evaṃ vitthārito abhāyanaākāro.