Hirī ca ottappañcāti "yaṃ hiriyati hiriyitabbena, ottappati ottappitabbenā"ti evaṃ vitthāritāni hiriottappāni. Apicettha ajjhattasamuṭṭhānā hirī, bahiddhāsamuṭṭhānaṃ ottappaṃ. Attādhipateyyā hirī, lokādhipateyyaṃ
@4 abhi. saṅ. 34/1330/299 5 abhi. saṅ. 34/1331/299 Ottappaṃ. Lajjāsabhāvasaṇṭhitā hirī, bhayasabhāvasaṇṭhitaṃ ottappaṃ vitthārakathā panettha sabbākārena visuddhimagge vuttā.
Dovacassatāti dukkhaṃ vaco etasmiṃ vippaṭikūlagāhimhi vipaccanīkasāte anādare puggaleti dubbaco, tassa kammaṃ dovacassaṃ, tassa bhāvo dovacassatā. Vitthārato panesā "tattha katamā dovacassatā. Sahadhammike vuccamāne dovacassāyan"ti abhidhamme āgatā. Sā. Atthato saṅkhārakkhandho hoti. Catunnañca khandhānaṃ etenākārena pavattānaṃ etaṃ adhivacanan"ti vadanti. Pāpamittatāti pāpā assaddhādayo puggalā etassa mittāti pāpamitto, tassa bhāvo pāpamittatā. Vitthārato panesā "tattha katamā pāpamittatā, ye te puggalā assaddhā dussīlā appassutā maccharino duppaññā. Yā tesaṃ sevanā nisevanā saṃsevanā bhajanā sambhajanā bhatti sambhatti taṃsampavaṅkatā"ti evaṃ āgatā. Sāpi atthato dovacassatā viya daṭṭhabbā