sovacassatā ca kalyāṇamittatā ca vuttapaṭipakkhanayena veditabbā. Ubhopi panetā idha lokiyalokuttaramissakā kathitā.

Āpattikusalatāti "pañcapi āpattikkhandhā āpattiyo, sattapi āpattikkhandhā āpattiyo. Yā tāsaṃ āpattīnaṃ āpattikusalatā paññā pajānanā"ti evaṃ vutto āpattikusalabhāvo.

Āpattivuṭṭhānakusalatāti "yā tāhi āpattīhi vuṭṭhānakusalatā paññā pajānanā"ti evaṃ vuttā saha kammavācāya āpattīhi vuṭṭhānaparicchedajānanā paññā.

Samāpattikusalatāti "atthi savitakkasavicārā samāpatti, atthi avitakkavicāramattā samāpatti, atthi avitakkaavicārā samāpatti. Yā tāsaṃ samāpattīnaṃ kusalatā paññā pajānanā"ti evaṃ vuttā saha parikammena appanāparicchedajānanā paññā. Samāpattivuṭaṭhānakusalatāti "yā tāhi samāpattīhi vuṭṭhānakusalatā paññā pajānanā"ti evaṃ vuttā yathā paricchinnasamayavaseneva samāpattito