Āyatanakusalatāti "dvādasāyatanāni cakkhvāyatanaṃ .pe. Dhammāyatanaṃ. Yā tesaṃ āyatanānaṃ āyatanakusalatā paññā pajānanā"ti evaṃ vuttā dvādasannaṃ āyatanānaṃ uggahamanasikārajānanapaññā. Apica dhātukusalatāpi uggahamanasikārasavanasammasanapaṭivedhapaccavekkhaṇesu vaṭṭati manasikārakusalatāpi āyatanakusalatāpi. Ayaṃ panettha viseso, savanauggahaṇapaccavekkhaṇā lokiyā, paṭivedho lokuttaro, sammasanamanasikārā lokiyalokuttaramissakā. Paṭiccasamuppādakusalatāti "avijjāpaccayā saṅkhārā .pe. Samudayo hotīti yā tattha paññā pajānanā"ti evaṃ vuttā dvādasannaṃ paccayākārānaṃ uggahādivasena pavattā paññā.

Ṭhānakusalatāti "ye ye dhammā yesaṃ yesaṃ dhammānaṃ hetū paccayā upādāya taṃ taṃ ṭhānanti yā tattha paññā pajānanā"ti evaṃ vuttā "cakkhuñca vatthuṃ katvā rūpaṃ ārammaṇaṃ katvā uppannassa cakkhuviññāṇassa cakkhurūpaṃ ṭhānañceva kāraṇañcā"ti evaṃ ṭhānaparicchindanasamatthā paññā. Aṭṭhānakusalatāti "ye ye dhammā yesaṃ yesaṃ dhammānaṃ na hetū na paccayā upādāya taṃ taṃ aṭṭhānanti yā tattha paññā pajānanā"ti evaṃ vuttā "cakkhuñca vatthuṃ katvā rūpaṃ ārammaṇaṃ katvā sotaviññāṇādīni na uppajjanti, tasmā tesaṃ cakkhurūpaṃ na ṭhānaṃ na kāraṇan"ti evaṃ aṭṭhānaparicchindanasamatthā paññā. Apica etasmiṃ duke "kittāvatā pana bhante ṭhānāṭhānakusalo bhikkhūti alaṃ vacanāyāti. Idhānanda bhikkhu aṭṭhānametaṃ anavakāso,

@3 abhi. saṅ. 34/1342/301 4 abhi. saṅ. 34/1343/301