@5 abhi. saṅ. 34/1344/301 6 abhi. saṅ. 34/1345/301 Yaṃ diṭṭhisampanno puggalo kiñci saṅkhāraṃ niccato upagaccheyya, netaṃ ṭhānaṃ vijjatīti pajānāti. Ṭhānañca kho etaṃ vijjati, yaṃ puthujjano kiñci saṅkhāraṃ niccato upagaccheyyā"ti imināpi suttena attho veditabbo.

Ājjavanti gomuttavaṅkatā candavaṅkatā naṅgalakoṭivaṅkatāti tayo anajjavā. Ekacco hi bhikkhu paṭhamavaye ekavīsatiyā anesanāsu chasu ca agocaresu carati, majjhimapacchimavayesu lajjī kukkuccako sikkhākāmo hoti, ayaṃ gomuttavaṅkatā nāma. Eko paṭhamavayepi pacchimavayepi catupārisuddhisīlaṃ pūreti, lajjī kukkuccako sikkhākāmo hoti, majjhimavaye purimasadiso, ayaṃ candavaṅkatā nāma. Eko paṭhamavayepi majjhimavayepi catupārisuddhisīlaṃ pūreti, lajjī kukkuccako sikkhākāmo hoti, pacchimavaye purimasadiso, ayaṃ naṅgalakoṭivaṅkatā nāma. Eko sabbametaṃ vaṅkataṃ pahāya tīsupi vayesu pesalo lajjī kukkuccako sikkhākāmo hoti, tassa yo so ujubhāvo, idaṃ ājjavaṃ nāma. Abhidhammepi vuttaṃ "tattha katamo ājjavo. Yā ājjavatā ajimhatā avaṅkatā akuṭilatā, ayaṃ vuccati ājjavo"ti. Lajjavanti "tattha katamo lajjavo. Yo hiriyati hiriyitabbena hiriyati pāpakānaṃ akusalānaṃ dhammānaṃ samāpattiyā. Ayaṃ vuccati lajjavo"ti evaṃ vutto lajjībhāvo.

Khantīti "tattha katamā khanti. Yā khanti khamanatā adhivāsanatā acaṇḍikkaṃ anassuropo attamanatā cittassā"ti evaṃ vuttā adhivāsanakhanti. Soraccanti "tattha katamaṃ soraccaṃ. Yo kāyiko avītikkamo, vācasiko avītikkamo, kāyikavācāsiko avītikkamo. Idaṃ vuccati soraccaṃ. Sabbopi sīlasaṃvaro soraccan"ti evaṃ vutto soratabhāvo.

Sākhalyanti "tattha katamaṃ sākhalyaṃ. Yā sā vācā aṇḍakā kakkasā parakaṭukā parābhisajjanī kodhasāmantā asamādhisaṃvattanikā, tathārūpiṃ vācaṃ pahāya yā sā vācā nelā kaṇṇasukhā pemanīyā hadayaṅgamā porī bahujanakantā