@7 cha.Ma. assaraṇatā 8 abhi. saṅ. 34/1357/304

@9 abhi. saṅ. 34/1357/340

Indriyesu aguttadvāratāti "tattha katamā indriyesu aguttadvāratā. Idhekacco cakkhunā rūpaṃ disvā nimittaggāhī hotī"ti ādinā nayena vitthārito indriyasaṃvarabhedo. Bhojane amattaññutāti "tattha katamā bhojane amattaññutā. Idhekacco appaṭisaṅkhā ayoniso āhāraṃ āhāreti davāya madāya maṇḍanāya vibhūsanāya. Yā tattha asantuṭṭhitā amattaññutā appaṭisaṅkhā bhojane"ti evaṃ āgato bhojane amattaññubhāvo. Anantaraduko vuttapaṭipakkhanayeneva veditabbo.

Paṭisaṅkhānabalanti "tattha katamaṃ paṭisaṅkhānabalaṃ. Yā paññā pajānanā"ti evaṃ vitthāritaṃ appaṭisaṅkhāya akampanañāṇaṃ. Bhāvanābalanti bhāventassa uppannabalaṃ. Atthato viriyasambojjhaṅgasīsena satta bojjhaṅgā honti. Vuttampi cetaṃ "tattha katamaṃ bhāvanābalaṃ. Yā kusalānaṃ dhammānaṃ āsevanā bhāvanā bahulīkammaṃ, idaṃ vuccati bhāvanābalaṃ. Sattapi bojjhaṅgā bhāvanābalan"ti.