Sīlasampadāti "tattha katamā sīlasampadā. Kāyiko avītikkamo"ti evaṃ pubbe vuttaṃ soraccameva sīlassa sampādanato paripūraṇato "sīlasampadā"ti vuttaṃ. Ettha ca "sabbopi sīlasaṃvaro sīlasampadā"ti idaṃ mānasikassa pariyādānatthaṃ vuttaṃ. Diṭṭhisampadāti "tattha katamā diṭṭhisampadā. Atthi dinnaṃ atthi yiṭṭhaṃ .pe. Sacchikatvā pavedentīti yā evarūpā paññā pajānanā"ti evaṃ āgataṃ diṭṭhipāripūribhūtaṃ ñāṇaṃ.

Sīlavisuddhīti visuddhiṃ pāpetuṃ samatthaṃ sīlaṃ. Abhidhamme panāyaṃ "tattha katamā sīlavisuddhi. Kāyiko avītikkamo vācasiko avītikkamo kāyikavācasiko avītikkamo, ayaṃ vuccati sīlavisuddhī"ti evaṃ vibhattā. Diṭaṭhivisuddhīti visuddhiṃ pāpetuṃ samatthaṃ dassanaṃ. Abhidhamme panāyaṃ "tattha katamā diṭṭhivisuddhi. Kammassakatañāṇaṃ saccānulomikañāṇaṃ maggasamaṅgissa ñāṇaṃ phalasamaṅgissa ñāṇan"ti evaṃ vuttā. Ettha ca tividhaṃ duccaritaṃ attanā katampi parena katampi sakakammaṃ nāma na hoti atthasambhañjanato. Sucaritaṃ sakakammaṃ nāma atthajananatoti evaṃ jānanaṃ kammassakatañāṇaṃ nāma. Tasmiṃ ṭhatvā bahuṃ vaṭṭagāmikammaṃ āyūhitvā sukhato sukheneva arahattappattānaṃ gaṇanā vītivattā. Vipassanāñāṇaṃ pana vacīsaccañca anulometi, paramatthasaccañca na vilometīti saccānulomikaṃ ñāṇanti vuttaṃ.

"diṭṭhivisuddhi kho pana yathā diṭṭhissa ca padhānan"ti ettha diṭṭhivisuddhīti ñāṇadassanaṃ kathitaṃ. Yathā diṭṭhissa ca padhānanti taṃsampayuttameva viriyaṃ. Apica purimapadena catumaggañāṇaṃ. Pacchimapadena taṃsampayuttaṃ viriyaṃ. Abhidhamme pana "diṭṭhivisuddhi kho panāti yā paññā pajānanā amoho dhammavicayo sammādiṭṭhi. Yathā diṭṭhissa ca padhānanti yo cetasiko viriyārambho sammāvāyāmo"ti evaṃ ayaṃ duko vibhatto.