@3 abhi. vi. 35/938/457 4 aṅ. dasaka. 24/61/120 (sayā)

@5 aṅ. dasaka. 24/62/124 (sayā) 6 aṅ. chakka. 22/334/462 (sayā) Pahātabbā"ti evaṃ cha. Sabbāsavapariyāye teyeva dassanāpahātabbehi saddhiṃ satta. Imasmiṃ pana saṅgītisutte tayo āgatā. Tattha "yo kāmesu kāmacchando"ti evaṃ vutto pañcakāmaguṇiko rāgo kāmāsavo nāma. "yo bhavesu bhavacchando"ti evaṃ vutto sassatadiṭṭhisahagato rāgo, bhavavasena vā patthanā bhavāsavo nāma. "dukkhe aññāṇan"ti ādinā nayena āgatā avijjā avijjāsavo nāmāti. Kāmabhavādayo kāmadhātuādivasena vuttāyeva. (20-21)

Kāmesanādīsu "tattha katamā kāmesanā, yo kāmesu kāmacchando kāmajjhosānaṃ, ayaṃ vuccati kāmesanā"ti evaṃ vutto kāmagavesanarāgo kāmesanā nāma. "tattha katamā bhavesanā, yo bhavesu bhavacchando bhavajjhosānaṃ, ayaṃ vuccati bhavesanā"ti evaṃ vutto bhavagavesanarāgo bhavesanā nāma. "tattha katamā brahmacariyesanā, sassato lokoti vā .pe. Neva hoti na hoti tathāgato parammaraṇāti vā, yā evarūpā diṭṭhi diṭṭhigataṃ vipariyesaggāho, ayaṃ vuccati brahmacariyesanā"ti evaṃ vuttā diṭṭhigatikasammatassa brahmacariyassa gavesanadiṭṭhi brahmacariyesanā nāma. Na kevalañca bhavarāgadiṭṭhiyova, tadekaṭṭhaṃ kammaṃpi esanāyeva. Vuttañhetaṃ "tattha katamā kāmesanā. Kāmarāgo tadekaṭṭhaṃ akusalaṃ kāyakammaṃ vacīkammaṃ manokammaṃ, ayaṃ vuccati kāmesanā. Tattha katamā bhavesanā. Bhavarāgo tadekaṭṭhaṃ akusalaṃ kāyakammaṃ vacīkammaṃ manokammaṃ, ayaṃ vuccati bhavesanā. Tattha katamā brahmacariyesanā. Antaggāhikā diṭṭhi tadekaṭṭhaṃ akusalaṃ kāyakammaṃ vacīkammaṃ manokammaṃ, ayaṃ vuccati brahmacariyesanā"ti (22)

vidhāsu "kathaṃvidhaṃ sīlavantaṃ vadanti, kathaṃvidhaṃ paññavantaṃ vadantī"ti ādīsu ākārasaṇṭhānaṃ vidhā nāma. "ekavidhena ñāṇavatthu duvidhena ñāṇavatthū"ti ādīsu koṭṭhāso. "seyyohamasmīti vidhā"ti ādīsu māno vidhā nāma. Idha so adhippeto. Māno hi seyyādivasena vidahanato vidhāti vuccati. Seyyohamasmīti iminā seyyasadisahīnānaṃ vasena tayo mānā vuttā. Sadisahīnesupi eseva nayo.