Tayo tamāti "tamandhakāro sammoho avijjogho mahābhayo"ti vacanato avijjā tamo nāma. Idha pana avijjāsīsena vicikicchā vuttā. Ārabbhāti āgamma. Kaṅkhatīti kaṅkhaṃ uppādeti. Vicikicchatīti vicinanto kicchaṃ āpajjati, sanniṭṭhātuṃ na sakkoti. Nādhimuccatīti tattha adhimuccituṃ na sakkoti. Na sampasīdatīti taṃ ārabbha pasādaṃ āropetuṃ na sakkoti. (29)

Arakkheyyānīti na rakkhitabbāni. Tīsu dvāresu paccekaṃ rakkhanakiccaṃ natthi, sabbāni satiyāeva rakkhitānīti dīpeti. Natthi tathāgatassāti "idaṃ nāma me sahasā uppannaṃ kāyaduccaritaṃ, imāhaṃ yathā me paro na jānāti, tathā rakkhāmi, paṭicchādemī"ti evaṃ rakkhitabbaṃ natthi tathāgatassa kāyaduccaritaṃ. Sesesupi eseva nayo. Kiṃ pana sesakhīṇāsavānaṃ kāyasamācārādayo aparisuddhāti. No aparisuddhā. Na pana tathāgatassa viya parisuddhā. Appassutakhīṇāsavo hi kiñcāpi lokavajjaṃ nāpajjati, paṇṇattiyaṃ pana akovidattā vihārakāraṃ kuṭikāraṃ sahāgāraṃ sahaseyyanti evarūpā kāyadvāre āpattiyo āpajjati. Sañcarittaṃ padasodhammaṃ uttariṃchappañcavācaṃ bhūtārocananti evarūpā vacīdvāre āpattiyo āpajjati. Upanikkhittasādiyanavasena manodvāre rūpiyapaṭiggahaṇāpattiṃ āpajjati,

Dhammasenāpatisadisassāpi hi khīṇāsavassa manodvāre saupārambhavasena manoduccaritaṃ uppajjatieva.

Pātumavatthusmiṃ hi pañcahi bhikkhusatehi saddhiṃ sāriputtamoggallānānaṃ paṇāmitakāle tesaṃ atthāya pātumeyyakehi sakyehi bhagavati khamāpite thero bhagavatā "kinti te sāriputta ahosi mayā bhikkhusaṃghe paṇāmite"ti puṭṭho ahaṃ parisāya abyattabhāvena satthārā paṇāmito. Itodāni paṭṭhāya paraṃ na ovadissāmīti cittaṃ uppādetvā āha "evaṃ kho me bhante ahosi bhagavatā bhikkhusaṃgho paṇāmito, appossukkodāni bhagavā diṭṭhadhammasukhavihāraṃ anuyutto viharissati, mayaṃpidāni appossukkā diṭṭhadhammasukhavihāraṃ anuyuttā viharissāmā"ti.