Athassa tasmiṃ manoduccarite upārambhaṃ āropento satthā āha "āgamehi tvaṃ sāriputta, na kho te sāriputta punapi evarūpaṃ cittaṃ uppādetabban"ti. Evaṃ paraṃ na ovadissāmi nānusāsissāmīti vitakkitamattaṃpi therassa manoduccaritaṃ nāma jātaṃ. Bhagavato pana ettakaṃ nāma natthi, anacchariyañcetaṃ. Sabbaññutaṃ pattassa duccaritaṃ na bhaveyya. Bodhisattabhūmiyaṃ ṭhitassa chabbassāni padhānaṃ anuyuñjantassāpi panassa nāhosi. Udaracchaviyā piṭṭhikaṇṭakaṃ allīnāya "kālakato samaṇo gotamo"ti evaṃ devatānaṃ vimatiyā uppajjamānāyapi "siddhattha kasmā kilamasi? sakkā bhoge ca bhuñjituṃ puññāni ca kātun"ti mārenapi pāpimatā vuccamānassa "bhoge bhuñjissāmī"ti vitakkamattaṃpi na uppajjati. Atha naṃ māro bodhisattakāle chabbassāni buddhakāle ekaṃ vassaṃ anubandhitvā kiñci vajjaṃ apassitvā idaṃ vatvā pakkāmi:-

satta vassāni bhagavaṃ anubandhiṃ padāpadaṃ

otāraṃ nādhigamissaṃ sambuddhassa satīmatoti.

Apica aṭṭhārasannaṃ buddhadhammānaṃ vasenāpi bhagavato duccaritābhāvo veditabbo. Aṭṭhārasa buddhadhammā nāma natthi tathāgatassa kāyaduccaritaṃ, natthi