@evaṃ saddo na dissati 4 cha.Ma. i. bhagavantaṃ 5 cha.Ma., i. nādhigacchissaṃ Vacīduccaritaṃ, natthi manoduccaritaṃ, atīte buddhassa appaṭihataṃ ñāṇaṃ, anāgate, paccuppanne buddhassa appaṭihataṃ ñāṇaṃ, sabbaṃ kāyakammaṃ buddhassa bhagavato ñāṇānuparivatti, sabbaṃ vacīkammaṃ, sabbaṃ manokammaṃ buddhassa bhagavato ñāṇānuparivatti, natthi chandassa hāni, natthi viriyassa hāni, natthi satiyā hāni, natthi davā, natthi ravā, natthi khalitaṃ, natthi sahasā, natthi abyāvato mano, natthi akusalaṃ cittanti. (30)

Kiñcanāti palibodhā. Rāgo kiñcananti rāgo uppajjamāno satte bandhati palibandhati, tasmā kiñcananti vuccati. Itaresupi dvīsu nayo. (31)

Aggīti anudahanaṭṭhena aggi. Rāgaggīti rāgo uppajjamāno satte anudahati jhāpeti, tasmā aggīti vuccati. Itaresupi dvīsu eseva nayo. Tattha vatthūni:- ekā daharabhikkhunī cittalapabbatavihāre uposathāgāraṃ gantvā dvārapālarūpakaṃ olokayamānā ṭhitā. Athassā anto rāgo uppanno, sā teneva jhāyitvā kālamakāsi. Bhikkhuniyo ca gacchamānā "ayaṃ daharā ṭhitā, pakkosatha nan"ti āhaṃsu. Ekā gantvā kasmā ṭhitāsīti hatthe gaṇhi. Gahitamattā parivattetvā papatā. Idaṃ tāva rāgassa anudahanatāya vatthuṃ. Dosassa pana anudahanatāya manopadosikā devā. Mohassa anudahanatāya khiḍḍāpadosikā devā daṭṭhabbā. Mohavasena hi tesaṃ satisammoso hoti. Tasmā khiḍḍāvasena āhārakālaṃ ativattitvā kālaṃ karonti. (32)