Mittavinduko hi mātarā "tāta ajja uposathiko hutvā vihāre sabbarattiṃ dhammassavanaṃ suṇa, sahassante dassāmī"ti vutto dhanalobhena uposathaṃ samādāya vihāraṃ gantvā idaṃ ṭhānaṃ akutobhayanti sallakkhetvā dhammāsanassa heṭṭhā nipanno sabbarattiṃ niddāyitvā gharaṃ agamāsi. Mātā pātova yāguṃ pacitvā upanāmesi. So sahassaṃ gahetvāva pivi. Athassa etadahosi "dhanaṃ saṃharissāmī"ti. So nāvāya samuddaṃ pakkhanditukāmo ahosi. Atha naṃ mātā "tāta imasmiṃ kule cattālīsakoṭidhanaṃ atthi, alaṃ gamanenā"ti nivāresi. So tassā vacanaṃ anādiyitvā gacchatieva, mātā purato aṭṭhāsi. Atha. Naṃ kujjhitvā "ayaṃ mayhaṃ purato tiṭṭhatī"ti pādena paharitvā pātitaṃ mātaraṃ antaraṃ katvā agamāsi.

Mātā uṭṭhahitvā "mādisāya mātari evarūpaṃ kammaṃ katvā gatassa me gataṭṭhāne sukhaṃ bhavissatīti evaṃ saññī nāma tvaṃ puttā"ti āha. Tassa nāvaṃ āruyha gacchato sattame divase nāvā aṭṭhāsi. Atha te manussā "addhā ettha pāpapuriso atthi, salākaṃ dethā"ti āhaṃsu. Salākā dīyamānā tasseva tikkhattuṃ pāpuṇi. Te tassa uḷumpaṃ datvā taṃ samudde pakkhipiṃsu. So ekaṃ dīpaṃ gantvā vemānapetīhi saddhiṃ sampattiṃ anubhavanto tāhi "purato purato mā agamāsī"ti vuccamāno, taddiguṇaṃ taddiguṇaṃ sampattiṃ passanto anupubbena khuracakkadharaṃ ekaṃ addasa. Tassa taṃ cakkaṃ padumapupphaṃ viya upaṭṭhāsi. So taṃ āha "ambho idaṃ tayā pilandhitapadumaṃ mayhaṃ dehī"ti. "na idaṃ sāmi padumaṃ, khuracakkaṃ etan"ti. So "vañcesi tvaṃ kiṃ mayā padumaṃ na diṭṭhapubban"ti vatvā tvaṃ lohitacandanaṃ vilimpitvā pilandhanaṃ padumapupphaṃ mayhaṃ na dātukāmoti āha. So cintesi "ayaṃpi mayā katasadisaṃ kammaṃ katvā tassa phalaṃ anubhavitukāmo"ti. Atha naṃ "handa demī"ti vatvā tassa matthake cakkaṃ pakkhipi. Tena vuttaṃ:-

@3 cha.Ma. te 4 cha.Ma. pāpuṇāti