Therattike jātimahallako gihijātitthero nāma. "cattārome bhikkhave therakaraṇā dhammā. Idha bhikkhave thero sīlavā hoti. Bahussuto hoti, catunnaṃ jhānānaṃ lābhī hoti, āsavānaṃ khayā .pe. Upasampajja viharati. Ime kho bhikkhave cattāro therakaraṇā dhammā"ti evaṃ vuttesu dhammesu ekena vā anekehi vā samannāgato dhammatthero nāma. Aññataro theranāmako bhikkhūti evaṃ theranāmako vā, yaṃ vā pana mahallakakāle pabbajitaṃ sāmaṇerādayo disvā thero theroti vadanti, ayaṃ sammatitthero nāma. (37)

Puññakiriyāvatthūsu dānameva dānamayaṃ. Puññakiriyā ca sā tesaṃ tesaṃ ānisaṃsānaṃ vatthu cāti puññakiriyāvatthu. Itaresupi dvīsu eseva nayo. Atthato pana pubbe vuttadānamayacetanādīnaṃ vaseneva saddhiṃ pubbabhāgaaparabhāgacetanāhi imāni tīṇi puññakiriyāvatthūni veditabbāni. Ekamekañcettha pubbabhāgato paṭṭhāya kāyena karontassa kāyakammaṃ hoti. Tadatthaṃ vācaṃ nicchārentassa vacīkammaṃ. Kāyaṅgavācaṅgaṃ acopetvā manasā cintentassa manokammaṃ. Annādīni dentassa vāpi annadānādīni demīti vā dānapāramiṃ āvajjetvā vā dānakāle dānamayaṃ puññakiriyāvatthu hoti. Vattasīle ṭhatvā dadato sīlamayaṃ. Khayato vayato sammasanaṃ paṭṭhapetvā dadato bhāvanāmayaṃ puññakiriyāvatthu hoti.

@3 aṅ. catukka. 21/22/26 4 cha.Ma., i. vattasīse