Sukhūpapattiyoti sukhapaṭilābhā. Uppādetvā uppādetvā sukhaṃ viharantīti te heṭṭhā paṭhamajjhānasukhaṃ nibbattetvā upari vipākajjhānasukhaṃ anubhavantīti attho. Sukhena abhisannāti dutiyajjhānasukhena tintā. Parisannāti samantato

Paripūrāti paripuṇṇā. Paripphuṭāti tasseva vevacanaṃ. Idaṃpi vipākajjhānasukhameva sandhāya vuttaṃ. Aho sukhaṃ aho sukhanti tesaṃ kira bhavalobho mahā uppajjati. Tasmā kadāci karahaci evaṃ udānaṃ udānenti. Santaṃyevāti paṇītameva. Saṃtusitāti tato uttariṃ sukhassa appaṭṭhanato santuṭṭhā hutvā. Cittasukhaṃ paṭivedentīti tatiyajjhānasukhaṃ anubhavanti. (41)

Sekkhā paññāti satta ariyapaññā. Arahato paññā asekkhā. Avasesā paññā nevasekkhā nāsekkhā. (42)

Cintāmayādīsu ayaṃ vitthāro:- "tattha katamā cintāmayā paññā, yogavihitesu vā kammāyatanesu yogavihitesu vā sippāyatanesu yogavihitesu vā vijjaṭṭhānesu kammassakataṃ vā saccānulomikaṃ vā rūpaṃ aniccanti vā .pe. Viññāṇaṃ aniccanti vā yaṃ evarūpaṃ anulomikaṃ khantiṃ diṭṭhiṃ ruciṃ muniṃ pekkhaṃ dhammanijjhānakkhantiṃ parato assutvā paṭilabhati, ayaṃ vuccati cintāmayā paññā. Tattha katamā sutamayā paññā, yogavihitesu vā kammāyatanesu .pe. Dhammanijjhānakkhantiṃ parato sutvāva paṭilabhati, ayaṃ vuccati sutamayā paññā. Tattha katamā bhāvanāmayā paññā sabbāpi samāpannassa paññā bhāvanāmayā paññā"ti. (43)