Anuttariyesu vipassanā dassanānuttariyaṃ. Maggo paṭipadānuttariyaṃ phalaṃ vimuttānuttariyaṃ. Phalaṃ vā dassanānuttariyaṃ. Maggo paṭipadānuttariyaṃ. Nibbānaṃ vimuttānuttariyaṃ. Nibbānaṃ vā dassanānuttariyaṃ, tato uttariñhi daṭaṭhabbaṃ nāma natthi. Maggo paṭipadānuttariyaṃ. Phalaṃ vimuttānuttariyaṃ, anuttariyanti uttamaṃ jeṭṭhakaṃ. (49)

Samādhīsu paṭhamajjhānasamādhi savitakkasavicāro pañcakanayena dutiyajjhāṇasamādhi avitakkavicāramatto. Seso avitakkaavicāro. (50)

Suññatādīsu tividhā kathā āgamanato saguṇato ārammaṇatoti. Āgamanato nāma eko bhikkhu anattato abhinivisitvā anattato disvā anattato vuṭṭhāti. Tassa vipassanā suññatā nāma hoti. Kasmā? asuññatakārakānaṃ kilesānaṃ abhāvā. Vipassanāgamanena maggasamādhi suññato nāma hoti. Maggāgamanena phalasamādhi suññato nāma. Aparo aniccato abhinivisitvā aniccato disvā aniccato vuṭṭhāti. Tassa vipassanā animittā nāma hoti. Kasmā? nimittakārakakilesābhāvā. Vipassanāgamanena maggasamādhi animitto nāma hoti. Maggāgamanena phalaṃ animittaṃ nāma. Aparo dukkhato abhinivisitvā dukkhato disvā dukkhato vuṭṭhāti, tassa vipassanā appaṇihitā nāma hoti. Kasmā? paṇidhikārakakilesābhāvā. Vipassanāgamanena maggasamādhi appaṇihito nāma hoti. Maggāgamanena phalaṃ appaṇihitaṃ nāmāti ayaṃ āgamanato kathā. Maggasamādhi pana rāgādīhi suññattā suññato, rāganimittādīnaṃ abhāvā animitto, rāgapaṇidhiādīnaṃ abhāvā appaṇihitoti ayaṃ saguṇato kathā. Nibbānaṃ rāgādīhi suññattā rāgādinimittapaṇidhīnañca abhāvā suññatañceva animittañca appaṇihitañca. Tadārammaṇo maggasamādhi suññato animitto apṇihito. Ayaṃ ārammaṇato kathā, (51)

soceyyānīti sucibhāvakarā soceyyapaṭipadā dhammā. Vitthāro panettha "tattha katamaṃ kāyasoceyyaṃ. Pāṇātipātāveramaṇī"tiādinā nayena vuttānaṃ tiṇṇaṃ sucaritānaṃ vasena veditabbo. (52)